 |
| رواية مريم الحلقة 6 |
#مريم
الجزء 6
و بعد لحضات و هو يبوس فيا و يتغزل فيا فقت من غيبوبتي و فجأه انهرت بالبكاء و خشيت في حاله غريبه .. حضني و قالي ما فتحتكش ما تخافيش .. باعدته و نبي انوض لقيت روحي كلي ملبزه .. دورت ملابسي و هو شادني يبي يحضني و يقولي انا نحبك خيرك .. نضت و لبست و كنت نبي نطلع و هو ما يبيش يخليني نطلع يقولي حبيبي شوفيلي انا راجلك راه ... دفيته و قتله سيبني خير ما نعيط .. كان يعرف اني منهاره و خلاني نطلع و مشيت للدار الي نرقد فيها و صكرت على روحي .. خشيت دوشت و انا نشوف لي جسمي الي عليه آثار قبلاته و انفاسه و ريقه ... ياااربي شن الي صار ... كملت دوش و كانت عندي رغبه نرقد في حضن امي و نبكي .. كانت عندي رغبه نحضن احمد و نقوله سامحني يا خوي يا حبيبي .. كانت عندي رغبه نزور قبر بابا و نقوله راهو انا مش هكي ... قعدت للصبح مقعمزه في مكاني و نبكي و حسام يتصل و يبعت في رسايل .. مشيت نوضت امي قتلها نوضي نبيك ... ناضت صلت و جتني قتلي خيره وجهك هكي اللطف شن في ؟ قتلها هي نروحوا ديري اي سبله .. قتلي شن على حسابك يوم هي نروحوا و يوم لا خلي نقعدوا ؟! .. قتلي خيرك علاش وجهك هكي و عيونك منفخات سمعتي شي على خوك ؟ قتلها لا .. قتلي شن في ؟ قتلها سمعت اخت اسماء تدوي عليا و متضايقين مننا .. و انا كرامتي ما تسمحليش نقعد هنا .. قتلي يا حنه حاطه العين على حسام و غايره منك ما تحسابش بنتي اشرف من الشرف و مش متع دوه فاضيه ... و جت باستني ... ياااااالله انهرت بالبكاء و في داخلي نقول بنتك ما تشرفكش و احقر من اي بنت ... كانوا دموعي نهر معاش يبي يوقف .. قتلي خلاص عاد سلام بنتي قتلها ماما .. قتلي نعم .. قتلها قلبي يوجع فيا .. خدتني في حضنها و انا منهاره بالكامل. قتلي انتي بنتي انا الي ربيتها صح و ما فيش حد يقدر يدوي عليها سمعتك في الشارع و في الجامعه الناس كلها تدوي بيها .. خلاص يا ماما ذبحتيني .. قتلي تو نقوللهم حوش عمك جايين اليوم و لازم نروحوا قتلها توا قبل ما ينوض حسام قتلي علاش ؟ قتلها لانه ح بقعد يقول لا خليكم و ما تروحوش .. قتلي به خلاص ..
نضت نوتي في حوايجي و نحيت السنسله و حطيتها في مكانها و رجعت كل شي و حطيته في الدولاب و لبست نظارتي و انا طالعه شميت ريحة عطر حسام نزلت نجري خفت يلحق علينا و انا مانبيه يشوفني و نزلت سلمت على ام حسام لقيتها تشرب في قهوتها قتلي خيرك مريضه ؟ قتلها الدوره مدايره فيا حاله ...
و شاورت لي امي هي نطلعوا و سلمنا و طلعنا .. مشينا مسافه على رجلينا و كنت خايفه يطلع بسيارته يلقانا .. ركبنا تاكسي و اول ما ركبت فتحت فوني و بعتله رساله ( حاجاتك كلهم في الدولاب خودهم قبل ما حد يشوفهم .... سلام ) اتصل بيا على طول صكرت فوني و خديت فون امي درته وضع طيران ..
حذفت راسي على كرسي السياره و كلي آلام و عبره خانقتني .. خيرها الطريق طويله .. زعمه نقدر نرجع مريم الي قبل !! نقدر ننسى الي صار ؟؟ كارهة جسمي و كارهة روحي و كارهة اليوم الي جيت فيه للحوش هذا ...
وصلنا حوشنا .. الله ما احلى ريحته .. خشيت داري و صكرت على روحي و قعدت نبكي و طلعت صورة بابا و احمد ...
سرحانه .. نفسيتي متدمره .. كيف نقدر نسامح نفسي ؟؟ شن ندير ؟؟
توا بس فهمت ليش حسام قالي انا ما نبيش نخون الصحبه .. توا بس فهمت يوم الي قالي انا متضايق ...
بعد ساعه رن الجرس .. نضت مخلوعه .. شفت من الروشن لقيته حسام ..
قلبي فز من مكانه ..
طلعت امي فتحت الباب و قاللها معقوله تروحوا من غير علمي و بالك في حد ضايقكم او في شي .. قتله امي لا ما ضايقنا حد لكن حوش سلفي جايين اليوم .. كنت واقفه وراء الباب نراقب فيه و نبكي و روحي بتطلع و نفسي بيوقف خلاص .. حطيت ايدي على قلبي بالك نهون عليه عذابه .. كان حسام تعبان و يحاول يكلم امي بهدوء بس باين عليه .. قاللها نجيكم اول ما يروحوا و ناخدكم قتله امي به ان شاءالله .. قاللها بالك تبو حاجة ؟ قتله امي لا سلامتك .. طلع و انا طحت على رجليا من كثر البكاء .. خشت امي قتلي نوضي معاي .. ما قدرتش نوقف .. قتلي في بينك و بينه حاجة ؟ هزيت براسي اهاااا ... قتلي صاحب خوك يا مريم ليه عليك يا بنتي .. قتلها انا نحبه و هو لا .. قتلي ما يعرفش ؟ قتلها لا ما يعرفش .. خدتني في حضنها و قتلي سلم بنتي هما وين و احنا وين .. ليش البكاء به ؟ قتلها لانه مش ليا .. قتلي انا عارفه ان اخت اسماء حاطه العين عليه .. هادوا ياخدوا من بعضهم ما يجوناش احنا .. نوضي سلم بنتي اغسلي وجهك و اقري قرآن و صلي صلاتك ..
نضت خشيت الحمام نسمع في الباب يطق .. طلعت امي فتحت الباب .. حسام تاني .. نسمع في امي تقوله هذا شنو يا وليدي ما فيش داعي .. قاللها في اي حاجة كلموني انا تو نقعد قريب ... اسكت يا حسام اسكت صوتك يعذب فيا .. و قعدت نبكي ... قال لي امي تليفون مريم مقفل تبيها رفيده بنت اختي .. قتله امي اهااا بالك شحن .. تو نقوللها تشوفه ..
مشى و مشت معاه روحي .. و طلعت لقيته جايب كل شي خضره لحم مشروب اميه مواد غدائيه خبزه حتى من الشكلاطه جايبها ..
قتلي امي شوفي هذا مفروض يجيبه راجل اختك لكن الله غالب و خلاص حتى الناس شن بيقولوا علينا ..
كلاني الحزن و ما كنتش قادره ننطق بكلمه وحده .. قتلي افتحي تليفونك رفيده تبيك ..
مشيت نصلي و اتكيت ع صلايتي و خداني النوم .. نوضتني امي قتلي نوضي المرأه جاتك ..
شكون ؟ من امرأه ؟
رفيده نوضي البسي حاجة تانيه و انزلي ...
نضت غسلت وجهي و لبست و نزلت .. اول ما سلمت عليها قتلي اووووو و خدتني في حضنها .. قعدت نبكي .. قتلي ليش عويناتك هكي .. و اعطتني بوسه ع خدي ..
قتلي حسام باعتني .. هو ما قالي شي لكن قالي بري هدرزي عليها و خليها تكلمني .. مريومه في حاجة ؟؟ قتلها لا ما في شي لكن تعاركنا .. قتلي ما نبيش نعرف السبب لو ما تبيش تحكي لان اكيد عندك خصوصيات و حسام في النهايه خالي .. لكن تأمني بالله اول مره نخش حوش بنت على خاطره و جوه متعكر و مرتين يجيني للحوش يقولي بريلها توا .. افتحي تليفونك و احكوا و تو كل شي يهون .. قتلها كصرته الجهاز .. لاني ما نبيش ننحرج قدامها و نضطر نفتحه ..
يتبع الجزء 7
