 |
| رواية مريم الحلقة 7 |
#مريم
الجزء 7
قتلي اوك تكلميه من فوني .. سكتت .. قتلي به على راحتك .. كانت مره مره تشوف فونها كان هزاز .. و خدت مني الاذن باش ترد .. ردت الو .... كان ردها كله امممممم به به اوك ان شاءالله ... قتلي مريومه اعتبريني وخيتك او صاحبتك صح انا اكبر منك 😉 بس ح نفهمك و نتفهمك .. و عيوني ما بطلوش دموع و امي كانت على اعصابها لان الموضوع بدا محير بالنسبه ليها .. رن الجرس .. فتحت امي الباب .. جت اختي و صغارها .. سلمت و طلعت هي و امي للدار التانيه .. قتلي رفيده ما احلاك حتى و انتي زعلانه .. ضحكت رغم الدموع و حالتي المزريه .. قتلي خالي عنده ذوق و يعرف يختار 😉 قتلها شكرا من ذوقك .. شدت ايدي و قتلي كلنا مرينا بتجارب صعبه و فوق مستوى احتمالنا لكن التجارب هادي تزيد من قوتنا و تنور عقولنا الي انتي تشوفيه اليوم كبير بكره تحسي بصغره .. و رن تليفونها .. قتلي هذا خالي حسام .. شوفي كم مكالمه .. لقيتهم 45 مكالمه .. سخفني و وجعلي قلبي لكن انا مش قادره نطلع من جو الحزن و تأنيب الضمير .. ردت عليه رفيده قاللها اعطيهالي خير ما قسماً بالله نجي للحوش نكلم امها .. قتله رفيده مش هكي ما تجيش الامور هكي .. كان يعيط على طول حسه اعطيهااااااااالي يا رفيده حرام عليك .. شبحتلي رفيده بعيونها و كأنها تترجاني نكلمه .. قتلها لا ما نبيش .. ردت عليه قتله مش تبيني نهدرز عليها ؟؟ خليني معاها شويه .. قاللها ما تبيش تكلمني ؟؟ قوووولي يا رفيده ما تبيش تكلمني ؟؟ قتله تو شويه و نتصل بيك .. قاللها به قولها تفتح فونها بس قالتله تكصر معاش يخدم ... قعد يسب و يقوللها نراجي انا اهو نراجي .. صكر الخط .. قتلي مريومه ما في شي يخليك اديري هكي الا اذا خانك !! قتلها لا ما خانيش .. استغربت .. قتلي انا ما نبيش نضغط عليك لكن ما يصيرش يقعد حاله هكي في النهايه هذا خالي .. جت امي و اختي قعمزوا معانا و بعد نص ساعه ممكن اتصل بيها قاللها اطلعي انا برا .. سلمت عليهم رفيده و طلعت انا معاها برا قتلي زي ما قتلك اعتبريني اختك و اي شي تبيه عيوني ليك و اتصلي في اي وقت .. فتحت الباب و طلعت قاللها شكون ؟ قتله مريومه .. نزل من السياره و جاني قدام الباب حط ايده ع الباب و قعد يشوفلي و انا ما قدرتش نقيم راسي بكل .. قالي هكي اديري فيا ؟ تبي نكلم امك توا ؟ شن تبي قولي و انا نديره ... اول مره نشوف دمعته و حالته احرف من حالتي ..
اعطاني كيسه فيها جهاز جديد .. قتله لا ما نبيشي .. قالي و رحمة بوي ما تاخديشي و تركبي شفرتك نهبل اليوم ... قتله نستاذنك نبي نخش .. قالي تعرفي صحه ليك بجد صحه ليك نهنيك انا ... نهنيك لاني لعبه نهنيك لاني مش راجل و ما عنديش قيمه عندك ... و حذف الجهاز على طول ايده و ركب سيارته و مشى ... صكرت الباب و بعد ما طلعوا من الشارع فتحته و خديت الكيسه الي فيها الجهاز ... و ركبت داري ...
عنده حق حسام هو ما كانش يبي يصير هكي ...
ما كنتش قادره نهدرز على اختي و لا حتى نقعمز معاها .. ركبت الدار و لبست المصلى و قعدت على الصلايه لين رقدت ...............
نضت الصبح خشيت الدوش و بدلت و نزلت قتلي امي خوك اليوم يطلع بيجيبه حسام يسلم علينا و يتسقد لتونس .. قتلها اهاا امتى جاي ؟؟ قتلي شوي تاني جايين ..
ركبت داري و تذكرت كل شي و انهمرت بالبكاء ...
كنت نقول في قلبي لاااااااااا لا احمد ما تجيش لا يا حبيبي ما تجيش .. ما تجيش يا اغلى اخ في الدنيا ...
قلبي معاش يتحمل انا خلاااااص يا رب سامحني و اغفرلي و برد قلبي يارب ...
بعد وقت نسمع في الباب و امي تبكي و اختي تبكي .. نزلت و في نص الدروج ركبت ... لا لا لا انا ما نقدرش نسلم عليه ... لا لا لا انا ما نقدرش نقابله ... ما نقدرش نحضنه .... حالي و كأني أم فقدت أبنها ... ننزل درجه و نركب درجتين ...
نسمع في احمد ينادي فيا مريوووومه تعالي ما تبيش تسلمي عليا ... تنهدت ااااااااه يا كسرة قلب مريومه و دموعي على خدي و قلبي بيتقطع ... لملمت قواي و نزلت و ما قدرتش نقيم راسي بكل ... خداني في حضنه و قال لي حسام اهيا بنتي الصغيره انا .. زادوا دموعي و زاد عذابي و احمد يقولي تو نروح و نقعد معاكم ما تخافيش ... كان حسام منهار بالكامل عيونه وقفته حالته كله كأنه قاعد في عزاء ... و ما قدرش يشد دموعه طلع و قال لي احمد انا برا .....
قعمزنا كلنا مع بعضنا قال احمد لي امي انا ما نقدرش نخليكم بروحكم هنا في الوقت نفسه ما نقدرش نرفعكم معاي لان تكاليف العلاج انا بروحي مش قادر عليها الافضل تمشوا تقعدوا في حوش خالي في الزاويه ...
انا انصدمت و ما قدرتش نتكلم .. قتله امي و اختك و قرايتها ؟؟ قاللها يا حي لين تبدا قرايتها نكون روحت انا ...
قتله امي انت تسقد امشي و ما تخممش فينا بكل .. و انا عيوني ما بطلوش دموع ..
قاللها الراجل ( حسام ) قالي خليهم يجو معاك اهلك و ما تدور شي لكن الافضل تمشوا حوش خالي لان الراجل جمايله هلبا عليا و معاش نبي نكثر عليه ... ناض احمد بيطلع و طلعنا معاه لقيت حسام مقعمز يدخن ...
خشيت توضيت و مشيت بنصلي يااارب هون مصيبتي و فرج كربي و اغفرلي .........
فتحت الفيس من اللابتوب لقيته باعتلي هلبا كلام و اخره ارجوك ما تمشيش الزاويه ... ما رديتش ..
و تاني يوم اتصل خالي قال امته تبوني نجيكم ؟ قتله امي ان شاءالله غير نوتوا حوايجنا .. الضهر اتصل حسام يسأل في امي بالك تبي حاجة ؟ قتله سامحني و راس وليدي تعبناك معانا .. قاللها انتي امي .. قالتله اهو خوي اتصل و تو يجي يرفعنا عنده على مرض على حاجة ع الاقل معانا راجل ... قاللها تعالوا اقعدوا مع امي و انا نطلع ..قتله لا عاد ما تجيش .. كان يقنع فيها بكل حجه لدرجة لما صكر الخط امي قتلي من كثر ما شد فيا لين تحشمت .. وتيت حوايجي و اتصلت بيا رفيده على تليفون امي ..
قتلي كيف حالك مريومه اليوم قتلها الحمدلله بخير .. قتلي شنو ماشيين ؟ قتلها ايه تغييرت جو .. قتلي به افتحي فونك او خلي جهاز امك عندك و تكلمي معاه ... قتلها حاضر اوك .. قتلي وعد ؟ قتلها وعد ...
صكرت بعدها بدقايق اتصل حسام و وديت عليه .. قالي شنو بتمشي ؟ قتله ايه .. قالي نقدر نكلمك ؟ قتله مش عارفه ...قالي به نبي نقولك حاجة قبل ما تمشي .. قتله نعم ؟ ... قالي و حق الله لو تبي توا ناخد طياره و نمشي نكلم خوك او نجيب امي تكلم امك و تبدي ليا رسمي ... قتله و من قالك بنوافق عليك !!!!!
انصدم قالي نعم ؟؟؟؟
قتله انا كلمتك لاني خديت بخاطر رفيده نقدر نصكر الخط توا ؟؟؟
صكري يا مريم صكري و نبدا مش راجل كان مازال كلمتك ... هنا انا بمجرد ما سمعت كلمته قلت خيرني هكي نعامل فيه ؟؟ ليش هكي رديت عليه ؟ ليش قتله هكي ؟؟ مش هذا حسام الي كنت بنهبل عليه .. مش هذا حسام الي بعتله اضافه و تجاهلني لانه راجل ما يبيش يخون صاحبه .. مش هذا حسام الي تعبت نفكر باش نوصله .. ليش درت فيه هكي ؟ ....
جى خالي و مشينا معاه و احنا طالعين من الشارع لقيته مدرس في سيارته ... شافنا و مشينا في حالنا و طول الطريق و انا نفكر فيه ...
لين وصلنا الزاويه
بتبع الجزء 8
