مساحة إعلانية
مساحة إعلانية

 

رواية مريم الحلقة 8
رواية مريم الحلقة 8


#مريم
الجزء 8
خشيت حوش خالي سلمت و قعمزت معاهم .. كانت الاجواء بسيطه تاخدك بساطتها و عفويتها لي راحه نفسيه عجيبه .. جت بنت خالي تهدرز عليا كانت تقرا في الثانوي .. و فرحانه بالتليفون الي شراهولها بوها .. قالتلي مريومه شوفي الفيس كيف فتحته ما ليشي هلبا ضيفيني مريومه جوه يهبل .. ابتسمت ابتسامه حسدتها فيها على براءتها و صفاء ذهنها و بساطة تفكيرها .. قتلها حاضر تو نضيفك .. قعدت شاده تليفونها و قتلي كيف نفتح الرسايل ؟ قتلها نزلي تطبيق اسمه ماسنجر .. قتلي نزليهولي انتي ... نزلتهولها و فتحاته و اول ما فتحاته جوها رسايل ترحيب .. قتلي هذا شنو ؟ قتلها اصدقاءك يرحبوا بيك ..قتلي حي عليا احذفيه احذفيه ما نبيه انا هذا ... ضحكت و نضت طلعت قعدت مقعمزه في السانيه برا .. الجو بارد .. هادي ... حضنت نفسي و قعدت مقعمزه لوقت متأخر و بعدين خشيت الحوش و شديت فراشي .. لحضات و انا في حضنه ملازمه تفكيري نطردها من راسي و نستغفر و ترجع تراودني تاني ... اكثر موقف قاعد بين عيوني لما حسام شدني و قالي انا ما فتحتكش راه و كان يبي يحضني و انا ندف فيه ... ااااااه قداش محتاجة للحضن هذا انا توا .. كانت كل ليله اصعب من الليله الي قبلها تملكني الشوق .. ليش معاش مدورني حسام .. معناها كان قاصد كلامه لما قالي نبدا مش راجل كان مزال كلمتك .. فتحت شفرتي و توقعته يكلمني اليوم الاول .. اليوم التاني .. اليوم الثالث .. ما تصلش و لا بعت رساله .. كانت الاجواء عاديه في حوش خالي كل يوم زي الي قبله و زي الي بعده حياتهم روتينيه ما تغير فيها شي ... و في ليله فتحت الانستا لقيته ليه فتره مش منزل شي شفت اخر بوست لقيته متع عرس بنت اخته ( اخت رفيده ) لقيت بنت في كل بوست تحط قلب احمر .. من هادي ؟ خشيت صفحتها لقيتها برايفت .. الاسم وهمي .. قلبي نار حسيت بالغيره بتاكل قلبي .. خشيت نشوف في كل بوست بروحه و من تعليقاتها عرفت ان هادي اخت اسماء ( مرت خوه ) زادت الغيره .. جت في بالي رفيده قلت خلي نتصل بيها ... اتصلت بي رفيده و ردت عليا .. كيف حالك رفيده ؟ الحمدلله كيف خالك انتي مريومه ؟ الحمدلله .. توا كيف ركبتيها شفرتك ؟؟ قتلها ايه كيف ركبتها .. قتلي لاني اتصلت بيك و لقيته مقفل .. كيف حالك و كيف خال ماما و شن جو الزوايه ؟ قتلها الحمدلله ماشي الحال هنا .. رفيده نبي نسألك .. تفضلي مريومه .. كيف حال حسام ؟ قتلي قصدك ما تكلمتوش حتى من تليفون امك ؟ قتلها لا ما تكلمناش .. قتلي و الله شن بنقولك معناها انتي ما تعرفي شي ؟؟ قتلها شن في ؟ قتلي المده الي فاتت ساهر في الحوازه هو و جماعته و نقزولهم زوز يبو يخنبوا و لا الله اعلم شن في في نيتهم .. يما قلبي .. قتلها به شن صار ؟ قتلي رمى عليهم حسام رصاص و واحد منهم توفى .. رفيده حسام كيف حاله ؟... قتلي سلم روحه للردع لان الي نقزوا يتبعوا كتيبه او مليشيه ... فتلها هو يدافع على روحه ليش قاعدين شادينه قتلي لانهم لما داروله تحليل لقوه شارب في نسبة كحول في دمه .. لكن الشباب الي معاه شهدوا بي الي صار و هدا في صالحه .. صكرت رفيده الخط و كان في صوتها لوم عليا .. كنت نبي نروح للحوش و مش طايقه القعده في الزاويه بكل .. به شن ندير كيف نفتح الموضوع لي امي ! نديتها قتلها هي نروحوا حوشنا قتلي خيرك اللطف شن صارلك ؟ قتلها اهي جارتنا امباركه تكلم فيك كل يوم و تقولك ما جى حد جهة حوشكم علاش خايفين احنا و مكبرين الموضوع و خالي يا دوبك يقدر يوكل صغاره خلاص لينا اسبوعين هي نروحوا قتلي به توا نقول لي خالك عندك حق حتى انا حسيت ان ظروفهم متملحه الفتره هادي .. كلمت خالي قالتله نبي نروح عندي موعد عيادة و هكي قاللها بكره نروح بيكم .. روحنا حوشنا و كنت كل شويه نتصل بي رفيده نسال و نطمن .. جيت لي امي قتلها سمعتي شن صار في حسام ولد ابله سعاد ؟ قتلي خيره شن في ؟ قتلها محبوس و حكيتلها القصه ... قتلي كيف و امته صار هذا كله ... اتصلت امي بي ابله سعاد و كانت منهاره وحالتها يرثى لها
قتلي امي لازم نمشيلهم .. قتلها به قولي لي راجل بنتك يجي يرفعنا و هو زي قلته ما في منه فايده .. شبحتلي امي و قتلي من قالك انتي بتمشي ؟؟؟!!!! قتلها كيف ؟ قتلي ما فيش مشي ..
سكتت و خشيت داري قعدت نبكي .. يااارب امتى تكمل موجة الحزن هادي .. امته نرتاح .... امته نفرح ... امتى ننسى كل شي ...
مع العصر جتني امي قتلي راجل اختك مش فاضي هي نوضي امشي معاي في تاكسي و خلاص عيب الناس ما سيبوناش وقت عازتنا ... و انتي و الله ما طايب على خاطري مشيك معاي غير ما نبيش نمشي في تاكسي بروحي .. الله غالب الواحد زي يدير نسابات زي لا ..
نضت وتيت روحي و طلعنا خدينا تاكسي و مشينا و اول ما خشينا لقيت ابله سعاد منهارة و كأنها في عزاء ... سلمنا و قعمزنا و عيوني ما بطلوش دموع .. قعدت امي تسأل فيها على حسام قالتلها ابله سعاد انا اليوم لا شفته و لا كلمته و لا سمعت صوته .. الله اعلم ولدي شن صاير فيه ..و هي تحكي و انا من كثر البكاء لين صوتي طلع و معاش قدرت نشد روحي .. جت ميسون ( ام رفيده ) قالتلها اهو محمود ( راجل ميسون ) حصل شكون يدخل تليفون لي حسام و توا يتصل بينا و نكلموه و نطمنوا عليه .. فرحت ابله سعاد و فرحت معاها و طار قلبي من الفرح ..
ناديت رفيده قتلها بيقعد عنده التليفون قتلي علمي علمك ما نعرفش ...
و بعد لحضات خشت ميسون و شاده التليفون و تقول لي امها تكلمي اهو حسام ع الخط .. انهمرت بالبكاء و حطيت ايدي على قلبي ... قعدت امه تكلم فيه و تبكي .. حسام تاكل كويس ؟ تتغطى كويس ؟يعاملوا فيك كويس ؟؟ كلمها شويه و صكر و نادت رفيده قالتلها قالك ديريلي ساكو صغير حطيلي فيه حوايج ... ركبت رفيده دار حسام و لحقتها و اول ما خشيت دار حسام شفت نفسي ع سريره و تذكرت كل شي .. هنا كانت بوساتنا .. هنا كانت احضاننا .. هنا صار كل شي و احلى شي في حياتي ... عيوني تورموا من كثر البكاء .. و تلفتت لقيت بوكس الشكلاطه و الورد الي ذبل و كل شي جنب دولاب حسام و خديت خاتم حسام من شنطتي و قتلها تخليني نحطه في الساكو ؟؟ قتلي عادي به .. لفيته بي كلينكس و بخيت عليه من عطري و حطيته في الساكو و نزلت ...
حسام ... يا نبض قلبي ... يا كلي انا .. يا دقاتي ... يا لهفتي .... يا عشقي و غرامي كله ... انا اسفه على كل لحضه زعلتك فيها ...
نزلت لقيت امي تستنى فيا و سلمنا قالت ميسون خليكم مزال شوي قالتلها امي هداكا هو مزال بناخدوا تاكسي و احنا مروحين قالت اخت اسماء قصدكم بتروحوا في تاكسي !!!!
قالتها بهزوى و طلعت و خليتها ... لحقتني رفيده قتلي لحضات و نروح بيكم .. قتلها لا ما نبيش نتعبك .. قتلي ما يرضاش حسام يخليكم تروحوا في تاكسي و كان سمع بيزعل مني ...
الله يا حسام محلاك و ما احلى شخصيتك .. الناس مدايريلك قدر حتى و انت مهناش ...
ركبنا مع رفيده و روحنا ..
و ركبت داري و لحقتني امي تسب و تعارك و قتلي درتيلي العار بي بكاك نضتي اندبتي و خلاص .. حتى الناس كلها تشوفلك ...
ما اهتميتش بي و لا كلمه من كلامها .. و هي طالعه قتلي معاش في مشي غادي بكل ...
اتصلت بي رفيده و قتلها التليفون عنده ؟ قتلي لحضات و نرد عليك ..
كانت اطول لحضات تمر عليا و ممكن لانشغالها نستني ...
عاودت اتصلت بيها قتلي اوووو سامحيني راه الجهاز بيقعد عنده ايه .. قتلها تعطيني الرقم ؟؟ قتلي تو نبعتهولك في مسج .. قتلها اوك نستنى ....
بعتتهولي و اول ما وصلني اتصلت طول ... قعد ينادي و ما رد حد ... زعمه زعلان ؟؟؟ او معاه حد ؟؟
تليفوني يشرين .. هو حسام ... يا قلبي انا ....
رديت : حبيبي
رد عليا : روحه حبيبك ... قالها بصوت كله ألم و حزن ...
قتله استاحشتك و خايفه عليك و بنموت انا بنموووووووت و قعدت نبكي ..
تنهد تنهيده تشق السماء ..
و قالي ما نقدرش نشد التليفون هلبا و بنصكر ..
قتله به و قعدنا ع الحال هذا اسبوعين كل يوم رساله بس و ما نسمعش في صوته و عايشه عذاب ما يبيش ينتهي ....
و في يوم كلمتني رفيده الصبح قتلي راه حسام طلع .. كيف و امتى و كيف حاله و و و و كنت بنطير من الفرحه .. قتلي زحمه عنده هلبا و ما عنداش تليفون .. قتلها رقمه الاول معاه .. قتلي لا خدوه منه و شفرته القديمه مزال ما طلعهاش ...
صكرت رفيده ...
قعدت نفكر كيف نبي نشوفه .. ضروري نشوفه .. نبي نحضنه .. نبي نبوسه ... نبي نشمه ... نبي نقوله نحبك و نموت في حبك ...
يتبع الجزء 9

admin
كاتب ومحرر اخبار اعمل في موقع قافية العرب - Arab rhyme .

جديد قسم : روايات